Am Fritiobe vor der Wanderig wärde die letschte wichtige Infos und Froge abtschegget…. WhatsApp sei Dank… aber mi wird nid schleuer, niemer het ä Ahnig wasme am beschte i Rucksack söu packe! Klar isch nume Schlofsack bruchts nid!! Dämentsprächend si töu Ruckseck gross und ä töu chli chliner…
Womer üs am Bahnhof z’Langethau träffe chunnt ou scho wider äs WhatsApp: dritthingerscht Waage! Dört hocke die drü vo witerwäg! Super Sitzglägeheit bis uf Oute, vo dört ah müessemer mit em Bode vorlieb nä u mer mache üs im Veloabtöu am Bode breit. Miteme EVE und eme Mütschli isch d Fahrt uf Luzärn churzwilig! In Luzärn müessemer chli pressiere und die letschte Meter ufe Zug spurte… phu het grad glängt. Si auui do? Zum Glück heimer scho in Oute luthaus ä Reiefoug abgmacht …mer chöme bis uf NÜN… 1. Käthy, 2. Tschibe, 3. Ele, 4. Süs, 5. Cindy, 6. Andle, 7. Ändle, 8. Nathy, 9. Rösi, SUPER auui do! Doch ou dä Zug uf Engelbärg isch platschvou u dr Bode gseht iladend und bequem us, döu lige eifach grad i Gang!
In Engelbärg simer losmarschiert, d Süs (üse Wanderleiter) isch sehr euforisch u mir näh sicher kes Gondeli. So simer nachere Stung uf dr Alp Ungertrüebsee. Dört stöuemer fescht, dass dr diräkt Wäg verschüttet isch! Mer müesse ä Umwäg louffe! Lueg dört hets ou nomou ä Gondle… Aber nachem Aperohalt mit Wisswy und Chips fühle mir üs sooo gschtercht, dasmer der nöchscht Aschtieg ou loufe! Nach witere 2 Schtung, eme fühlbaare 100% Ufschtieg und ere Souhitz simer bim Trüebsee acho! Nachdäm mer über wunderschöni blühendi Wiese glüffe si, suechemer es schöns Plätzli bim Knorrlibrunne am See. Chuum heimer dr Rucksack mit üsem Mittagässe uspackt, entlärtsech genau über üs es Gwitter. Es rägnet in ströme und mer müesse d’Rägejagge alege! Ä so blibemer nid lang am See u mache üs wieder ufe Wäg!
Vo dört hättemer no einisch ä 1 1/2-schtündige Aschtieg vor üs, da mer aber scho zimlech lang ungerwägs si gsi u jetz doch fasch auui scho chli müedi Bei hei, nämer d Sässubahn bis ufe Jochpass. Zum Glück het’s sogar ä Hube, es rägnet zwar nüm so fescht, isch aber trotzdäm agnähmer! De Mungge womer chöi beobachte macht dr Räge nüt us. Jetzt geits ändlech mou bärgab und mer wandere gäge Engstlensee. Chuum simer wieder ungerwägs, flügt üs dr ganz See um d’Ohre! Es rägnet horizontal dr Bärg z’deruf! Es blitzt und donneret! Zum Glück hets ufder Engstlealp / Rossbode es tolls Alpbeitzli u mer chöi üs ungerde Sunneschtore vom Räge schütze u ä warmi Schoggi, es Kafi oder doch ä Glace bschtöue! Nacheme Kehrli hört’s du doch uf rägne und mer chöi der letscht Aschtieg i Agriff näh! Nach nomou ere Schtung ueche loufe chömemer doch zimlech kabutt bi üsere Übernachtigsungerkunft Bärghuus Tannalp ah!
Zimmer bezieh im erschte Stock (het das höchi Schtägetritte…). Die füf jüngere und die rifere vier Froue zämä imene Zimmer…. Zum dusche müessemer aschtoh, auui Zimmer si bsetzt u es het doch zimlich vöu Lüt. Doch auui bechöme warms Wasser und mer si parat für’s z’Nacht! Mmhh tönt guet: Blumenkohlcrèmesuppe *** Rinds-Stroganoff mit Riis und Spinet*** Panna Cotta mit Waldbeeri. Nachem Apero mit „November“ gniessemer das feine z’Nacht. Nachem Ässe wird gschpöut: „Wiiberobe“ — es chöme sooo einigi Gheimniss as Tagesliecht… Nachem „Wer im Raum?“ si du doch auui riif für is Näschtli.
Es isch gli wieder Morge… doch üsi Oberbewegigstechnikere Rösi, hautets nid so lang us im Bett u muess die fürigi Energie scho am Morge los wärde… Nacheme wärschafte guete Zmorgebuffet packemer üsi Sache zämä u träffe üs dusse bi schönschtem Sunneschiin zum Abmarsch.
Vor Tannalp geits richtig Melchsee-Frutt, verbi am Tannsee und am Melchsee.
Dört gits no es Schöttli u de geits ou scho bärgab, ca. 2 Stung abeloufe uf Stöckalp…Läck isch das wit, oder si d Bei sooo müed? U heiss isches! Wär het gseit mer loufe abe? Geits no wit? Wenn fahrt s Poschtouto? Chöimer im Schatte ä Pouse mache? I HA HUNGER!!! Es isch nümme wit… Vorwärts…. Dunge git’s es Ice Caffee… oder Schpaghetti oder Schnipo, am liebschte aues mitenang!! I ha Hunger…
Ändlech am Ziiu heimer doch no Zit für is Restaurant, aber für’s grosse Menü längt’s nid, auso nume ä Glace! Im Poschtouto wird’s wieder äng, doch auui finge ä Platz zum hocke u nach 30 Minute simer in Sarnen ir nöchi vom Bahnhof acho. Da no grad s’Jodlerfescht isch udr Feschtumzug im Gang isch, müessemer die letschte Meter zum Bahnhof marschiere, lang Zyt heimer ou do nid, dr Zug chunnt ou scho gli… D’Heireis isch churzwilig und zimlech schtöu…
Danke Süs für die super organisierti Wanderig!!! Het Spass gmacht und mer si üs einig… Fortsetzung folgt!
